وبائی امراض کی روک تھام کاعالمی دن آج منایا جا رہا ہے

دنیا بھر میں آج وبائی امراض کی روک تھام کا عالمی دن منایا جا رہا ہے، جس کا مقصد مستقبل میں ممکنہ وباؤں سے بچاؤ کے لیے تیاری، آگاہی اور بین الاقوامی تعاون کو فروغ دینا ہے۔

اس عالمی دن کے موقع پر اس عزم کا اعادہ کیا جاتا ہے کہ وبائی امراض سے مؤثر انداز میں نمٹنے کے لیے صحت کے نظام کو مضبوط بنایا جائے، تحقیق، تشخیص اور نگرانی کے عمل کو بہتر کیا جائے اور ممالک کے درمیان باہمی تعاون کو مزید فعال بنایا جائے تاکہ انسانی جانوں کا تحفظ یقینی بنایا جا سکے۔

ماہرین صحت کا کہنا ہے کہ حالیہ برسوں میں دنیا کو کووڈ 19، انفلوئنزا، کانگو وائرس سمیت کئی وبائی امراض کا سامنا کرنا پڑا، جنہوں نے عالمی سطح پر صحت کے نظام کو شدید دباؤ میں مبتلا کر دیا۔ وبائی امراض زیادہ تر پسماندہ اور ترقی پذیر ممالک میں زیادہ مہلک ثابت ہوتے ہیں جہاں صحت، صفائی اور غذائی سہولیات پہلے ہی ناکافی ہوتی ہیں۔

عالمی ادارہ صحت اور دیگر ادارے اس دن کے ذریعے حکومتوں، اداروں اور عوام کو خبردار کرتے ہیں کہ بروقت اقدامات، ویکسینیشن، مؤثر نگرانی اور عالمی تعاون ہی وبائی امراض سے بچاؤ کا واحد مؤثر راستہ ہے۔