لیاری جنرل اسپتال میں خواتین کے علاج میں جدید روبوٹک سرجری کی سہولت

سندھ گورنمنٹ لیاری جنرل اسپتال نے خواتین کے علاج میں جدید ٹیکنالوجی کے استعمال کا اہم سنگ میل عبور کرتے ہوئے 100 سے زائد گائنی روبوٹک سرجریز کامیابی سے مکمل کر لی ہیں۔ اس کامیابی کی مناسبت سے منعقدہ تقریب میں سیکریٹری صحت سندھ طاہر حسین سانگی، رکن قومی اسمبلی یوسف بلوچ، نادر نبیل گبول اور طبی ماہرین نے شرکت کی۔ سیکریٹری صحت نے بتایا کہ روبوٹک سرجری حکومتِ سندھ کی جدید ہیلتھ پالیسی کا حصہ ہے، جس کا دائرہ کار جناح پوسٹ گریجویٹ میڈیکل سینٹر (JPMC) اور دیگر اداروں تک پھیلایا جا رہا ہے۔ تقریب میں بتایا گیا کہ روبوٹک سرجری روایتی طریقوں کے مقابلے میں 63 فیصد سستی ثابت ہو رہی ہے اور اس کے نتائج انتہائی موثر ہیں۔ نادر نبیل گبول نے اس موقع پر بتایا کہ سندھ حکومت نے صحت کے شعبے کے لیے جی ڈی پی کا 11 فیصد (تقریباً 400 ارب روپے) مختص کیا ہے تاکہ عوام کو جدید ترین مفت طبی سہولیات فراہم کی جا سکیں۔