صرف 25 منٹ بیٹھنا بھی دل کے لیے خطرناک؟ تحقیق نے خبردار کردیا

آسٹریلیا کی سوئن برن یونیورسٹی کی ایک نئی طبی تحقیق میں انکشاف کیا گیا ہے کہ صرف 25 منٹ تک ایک ہی جگہ مسلسل بیٹھے رہنا دل کی صحت کے لیے شدید نقصان دہ ثابت ہو سکتا ہے، جو رگوں میں خون کے جمنے، ہائی بلڈ پریشر اور دل کے دورے کے امکانات کو بڑھا سکتا ہے۔

طبی جریدے ‘این جے پی’ میں شائع ہونے والی اس تحقیق کے سربراہ ڈاکٹر کرسچن برکنرج (Dr. Christian Brakenridge) اور ان کی ٹیم نے خصوصی سینسرز سے لیس شارٹس کا استعمال کرکے روزمرہ زندگی میں 7 ہزار سے زائد مرتبہ بیٹھنے کے دورانیوں کا ڈیٹا ریکارڈ کیا۔ تحقیق سے معلوم ہوا کہ 25 منٹ سے زیادہ مسلسل بیٹھنے سے پٹھوں کی سرگرمی سست پڑنے لگتی ہے، جس سے خون کی روانی اور شکر کو جذب کرنے کا عمل متاثر ہوتا ہے اور طویل مدت میں یہ عارضہ قلب اور ٹائپ ٹو ذیابیطس کا سبب بن سکتا ہے۔

ماہرین کا کہنا ہے کہ ہر قسم کا بیٹھنا یکساں نقصان دہ نہیں ہوتا؛ مثال کے طور پر دفتر میں کام کرنے یا گاڑی چلانے کے دوران جسم کے کچھ پٹھوں میں معمولی حرکت جاری رہتی ہے، جبکہ گھنٹوں ایک ہی حالت میں ٹی وی یا اسکرین کے سامنے بیٹھنے سے پٹھے مکمل غیر فعال ہو جاتے ہیں۔ ماہرین نے تجویز دی ہے کہ اگر کوئی شخص روزانہ 10 گھنٹے بھی بیٹھ کر گزارتا ہے، تو وہ ہر 25 منٹ بعد اٹھ کر چند قدم چلنے، پانی لینے جانے یا پوزیشن بدلنے کے معمول سے اپنے پٹھوں کی سرگرمی میں ڈیڑھ گھنٹے تک کا اضافہ اور غیر فعالی میں 10 فیصد کمی لا سکتا ہے