ملک میں 10 اکتوبر کے بعد ٹو ڈی بار کوڈ کے بغیر ادویات کی تیاری ممنوع قرار دیدی گئی

ڈریپ (ڈریپ – ڈرگ ریگولیٹری اتھارٹی آف پاکستان) نے ملک بھر میں جعلی اور غیر معیاری ادویات کے خاتمے کے لیے بڑا اقدام اٹھاتے ہوئے 10 اکتوبر کے بعد سے “ٹو ڈی بار کوڈ” (2D Barcode) کے بغیر تمام اقسام کی ادویات کی مقامی تیاری اور فروخت پر مکمل پابندی عائد کر دی ہے۔ اس قانون کے تحت تمام مقامی اور ملٹی نیشنل دوا ساز کمپنیاں اپنی مصنوعات پر ٹو ڈی بار کوڈ سیریل نمبر درج کرنے کی پابند ہوں گی، جبکہ ملک میں درآمد کی جانے والی ادویات پر بھی ٹو ڈی بار کوڈ کے بغیر سیلز کی اجازت نہیں ہوگی۔

ڈریپ حکام کے مطابق انجیکشنز، سیرپ، کیپسول، اور ٹیبلٹس سمیت ڈبے میں پیک ہر دوا پر ٹو ڈی بار کوڈ اور منفرد سیریل نمبر درج کرنا لازمی ہو گا۔ اس ٹیکنالوجی کے انضمام کے بعد فارمیسیز، میڈیکل اسٹورز کی انتظامیہ کے ساتھ ساتھ عام صارفین بھی ایک خاص موبائل ایپلیکیشن کے ذریعے اسکین کر کے دوا کے اصل یا نقل ہونے، اس کی مقررہ قیمت، تاریخِ تیاری اور معیاد کی تفصیلات آن لائن دیکھ سکیں گے۔ ڈریپ نے اس نئے ریگولیٹری فریم ورک پر مکمل عملدرآمد یقینی بنانے کے لیے تمام دوا ساز کمپنیوں کے نمائندوں، صوبائی ڈرگ انسپکٹرز اور دیگر متعلقہ اسٹیک ہولڈرز کی جامع تربیت بھی مکمل کر لی ہے۔