امریکا: پولیو جیسی بیماری کا سبب بننے والا وائرس بچوں میں پھیلنے لگا

امریکی ریاست کیلیفورنیا میں سانس کا ایک خطرناک وائرس تیزی سے پھیل رہا ہے جو نایاب صورتوں میں بچوں میں پولیو جیسی ایک معذور کن بیماری کا سبب بن سکتا ہے۔ گندے پانی کے نمونوں کی نگرانی کرنے والے ادارے ‘وایسٹ واٹر اسکین’ کے اعداد و شمار کے مطابق، انٹرو وائرس ڈی 68 (EV-D68) کی مقدار بے ایریا کے مختلف علاقوں بشمول پالو آلٹو، ناپا، جنوب مشرقی سان فرانسسکو اور سان رافیل میں مسلسل بڑھ رہی ہے۔ ماہرین کے مطابق عام طور پر موسمِ گرما کے اختتام اور خزاں کے آغاز میں پھیلنے والے اس وائرس کی علامات نزلہ، زکام، کھانسی اور سانس لینے میں دشواری جیسی ہوتی ہیں، تاہم شیر خوار اور کم عمر بچوں میں یہ پیچیدہ ہو کر نمونیا کا روپ بھی دھار سکتا ہے۔ انتہائی نایاب صورتوں میں یہ وائرس ‘ایکیوٹ فلیکسڈ مائیلائٹس’ (AFM) نامی خطرناک اعصابی بیماری کا سبب بنتا ہے جو بچوں کے پٹھے کمزور یا معذور کر سکتی ہے۔ طبی ماہرین نے والدین کو خبردار کیا ہے کہ بچوں میں سانس کی شدید دشواری یا غیر معمولی اعصابی علامات ظاہر ہونے کی صورت میں فوری طور پر ڈاکٹر سے رجوع کیا جائے۔