بلڈ شوگر جیسے مسئلے سے بچنے کا آسان ترین طریقہ

ایسے افراد جو باضابطہ طور پر ذیابیطس ٹائپ 2 کے شکار نہیں ہوتے لیکن ان کا بلڈ شوگر لیول معمول سے زیادہ ہوتا ہے، جن کے لیے ‘پری ڈائبیٹیز’ (Prediabetes) کی اصطلاح استعمال کی جاتی ہے، ان میں متعدد جان لیوا امراض کا خطرہ نمایاں طور پر بڑھ جاتا ہے۔ تاہم، ایک نئی طبی تحقیق میں انکشاف ہوا ہے کہ پری ڈائبیٹیز اور ذیابیطس ٹائپ 2 سے بچاؤ کا ایک آسان ترین طریقہ اپنے گھر والوں کے ساتھ مل کر کھانا کھانا ہے۔

طبی جریدے ‘سائنس ایڈوانسز’ میں شائع ہونے والی اس تحقیق کے مطابق، جو افراد اپنے گھر والوں کے ساتھ کھانا کھاتے ہیں، ان میں بلڈ شوگر کی سطح تنہا کھانے والوں کے مقابلے میں بہت کم بڑھتی ہے۔ تحقیق میں بتایا گیا ہے کہ پیاروں کے ساتھ بیٹھ کر زیادہ کاربوہائیڈریٹس پر مبنی غذا استعمال کرنے کے باوجود گلوکوز کی سطح میں معمولی اضافہ ہوتا ہے اور جسم تیزی سے اسے معمول پر لے آتا ہے۔ محققین کے مطابق انسانی جسم فطری طور پر سماجی میل جول کا عادی ہے اور اپنے پیاروں کی موجودگی میں جسمانی توانائی بہتر طریقے سے ریگولیٹ ہوتی ہے، جس سے نہ صرف بلڈ شوگر کنٹرول میں رہتی ہے بلکہ جسمانی درجہ حرارت بہتر ہوتا ہے اور ذہنی تناؤ میں بھی کمی آتی ہے۔ ماہرین کا کہنا ہے کہ یہ عمل دوا، ورزش یا متوازن غذا کا متبادل تو نہیں، لیکن ہائی بلڈ شوگر، دل کے امراض اور ذیابیطس سے محفوظ رہنے کا ایک مؤثر اضافی ذریعہ ضرور ہے۔