پولیو ٹیم پر حملہ، تین افراد کے خلاف مقدمہ درج

لاہور کے تھانہ ریس کورس کی حدود میں پولیو ورکرز کی ٹیم پر ہونے والے حملے کا مقدمہ ہیلتھ انسپکٹر کی مدعیت میں متعلقہ تھانے میں درج کر لیا گیا ہے۔ پولیس کے مطابق ملزمان کے خلاف کل 5 مختلف دفعات کے تحت مقدمہ درج کیا گیا ہے۔

مقدمے کے متن کے مطابق محکمہ صحت کی پولیو ٹیم گلی نمبر 125 میں اپنے فرائضِ منصبی سرانجام دے رہی تھی کہ اس دوران ایک بااثر شخص نے اپنی والدہ کے ہمراہ ٹیم کے استفسار پر تلخ کلامی کی اور بدتمیزی کی۔ ایف آئی آر میں درج تفصیلات کے مطابق ملزمان کی جانب سے پولیو ٹیم کو سنگین نتائج کی دھمکیاں دی گئیں اور گالم گلوچ کی گئی۔ مجموعی طور پر تین افراد اور ایک خاتون (والدہ) نے پولیو ٹیم پر جسمانی تشدد کیا۔

متن میں مزید بتایا گیا ہے کہ حملہ آوروں نے ڈیوٹی پر موجود ہیلتھ انسپکٹر پر بھی حملہ کیا اور اس کے ہاتھ سے سرکاری کاغذات چھین کر پھاڑ دیے۔ مدعیِ مقدمہ نے پولیس سے مطالبہ کیا ہے کہ کورونا اور پولیو جیسی قومی مہمات میں رکاوٹ بننے والے ان عناصر کے خلاف سخت ترین قانونی کارروائی عمل میں لائی جائے۔