نوشکی میں انسداد پولیو ٹیم کے سکیورٹی سکواڈ پر فائرنگ، دو پولیس اہلکار شہید

بلوچستان کے ضلع نوشکی کے علاقے کلی جمال آباد میں شرپسندوں نے انسدادِ پولیو ٹیم کے سیکیورٹی اسکواڈ پر فائرنگ کر دی، جس کے نتیجے میں دو پولیس اہلکار موقع پر ہی شہید ہو گئے۔ سیکیورٹی ذرائع کے مطابق حملہ آور فائرنگ کے بعد شہید اہلکاروں، محمد یاسر اور عبدالروف، کا سرکاری اسلحہ بھی اپنے ساتھ چھین کر فرار ہو گئے۔ واقعے کے فوراً بعد شہید اہلکاروں کی لاشوں کو ٹیچنگ ہسپتال نوشکی منتقل کر دیا گیا۔ پولیس اور سیکیورٹی فورسز نے علاقے کو گھیراؤ میں لے کر سرچ آپریشن شروع کر دیا ہے اور واقعے کی مزید قانونی و معائناتی تحقیقات جاری ہیں۔

وفاقی وزیرِ داخلہ محسن نقوی نے پولیو ٹیم کی سیکیورٹی پر مامور اہلکاروں پر حملے کی شدید الفاظ میں مذمت کی اور شہدا کے لواحقین سے دلی تعزیت کا اظہار کرتے ہوئے کہا کہ بچوں کا مستقبل محفوظ بنانے والی ٹیم پر حملہ درندہ صفت عناصر کا ناقابلِ معافی فعل ہے۔ دوسری جانب، بلوچستان حکومت کے معاون برائے داخلہ بابر یوسفزئی نے واقعے پر ردِعمل دیتے ہوئے کہا کہ انسدادِ پولیو ٹیم پر حملہ بلوچستان کے بچوں کے صحت مند مستقبل پر حملہ ہے۔ انہوں نے کہا کہ دہشت گرد عناصر خطے میں امن، ترقی اور بیماریوں کے خاتمے کے خلاف ہیں، تاہم سیکیورٹی فورسز ان عناصر کو عبرتناک انجام تک پہنچائیں گی۔