عباسی شہید اسپتال کا 2 ماہ سے بند شعبہ اطفال دوبارہ فعال

کراچی کے معروف عباسی شہید ہسپتال میں طبی عملے کی کمی کے باعث 02 ماہ سے بند رہنے والا شعبۂ اطفال (پیڈز وارڈ) بالآخر دوبارہ فعال کر دیا گیا ہے۔

کے ایم سی (KMC) کے سینئر ڈائریکٹر میڈیکل آفیسر ڈاکٹر بابر خان نے شعبۂ اطفال کا تفصیلی دورہ کیا اور بحالی کے انتظامات کا جائزہ لیا۔ میڈیا سے گفتگو کرتے ہوئے انہوں نے بتایا کہ عملے کی کمی کا مسئلہ نئے ایف سی پی ایس (FCPS) پوسٹ گریجویٹ ٹرینیز کی تعیناتی کے بعد حل کر لیا گیا ہے، جس کی بدولت وارڈ کو مکمل طور پر بحال کر کے بچوں کے علاج معالجے کا آغاز کر دیا گیا ہے۔

ڈاکٹر بابر خان نے بتایا کہ شعبۂ اطفال میں 02 جنرل وارڈز، پی آئی سی یو (PICU) اور این آئی سی یو (NICU) سمیت جدید طبی سہولیات موجود ہیں۔ پی آئی سی یو میں 07 بیڈز اور 04 مکینیکل وینٹی لیٹرز جبکہ این آئی سی یو میں 20 انکیوبیٹرز اور 02 نیونیٹل وینٹی لیٹرز فعال کر دیے گئے ہیں۔ انہوں نے مزید بتایا کہ دوسرا جنرل پیڈیاٹرک یونٹ بھی 16 اگست تک بحال کر دیا جائے گا، جبکہ شعبے میں غذائی قلت، دمہ اور اعصابی امراض کے خصوصی کلینکس بھی باقاعدہ کام کر رہے ہیں۔