محدود اوقات میں کھانا بڑھاپے میں کس تکلیف سے بچا سکتا ہے؟

ایک نئی ابتدائی (پائلٹ) تحقیق کے مطابق روزانہ کھانے کے اوقات 9 گھنٹے تک محدود رکھنے اور سونے سے 4 گھنٹے قبل کھانا بند کرنے سے معمر خواتین میں بڑھاپے کے دوران دماغی صلاحیتوں کی کمی اور ڈیمنشیا کے خطرے کو سست کیا جا سکتا ہے۔ امریکہ کی رٹجرز یونیورسٹی کی غذائی ماہر پروفیسر سو شیپسز کے مطابق وزن میں کمی کے ساتھ ساتھ مقررہ وقت پر کھانا اضافی دماغی فوائد فراہم کرتا ہے۔ واضح رہے کہ عالمی سطح پر ہر سال تقریباً 20 لاکھ افراد ڈیمنشیا کے باعث جاں بحق ہوتے ہیں، جبکہ درمیانی عمر میں موٹاپا لاحق ہونے سے بعد کی زندگی میں اس کا خطرہ 30 فیصد تک بڑھ جاتا ہے۔ ماہرین کا کہنا ہے کہ عمر اور جینیات کو تبدیل نہیں کیا جا سکتا، تاہم صحت مند طرزِ زندگی اور وقت پر غذا سے تقریباً نصف کیسز کو روکا یا تاخیر کا شکار کیا جا سکتا ہے۔