پاکستان اور دنیا بھر سے پولیو کے مکمل خاتمے کیلیے آئندہ 6 ماہ فیصلہ کن قرار

نیشنل ایمرجنسی آپریشنز سینٹر (NEOC) نے واضح کیا ہے کہ پاکستان سمیت دنیا بھر سے پولیو وائرس کے مکمل خاتمے کے لیے آئندہ 6 ماہ انتہائی فیصلہ کن حیثیت رکھتے ہیں۔ یہ بات گلوبل پولیو ایریڈیکیشن انیشیٹو کے پولیو اوور سائٹ بورڈ کے ایک اعلیٰ سطحی وفد کے دورہ پاکستان کے دوران سامنے آئی، جہاں وفد نے نیشنل ای او سی میں انسدادِ پولیو پروگرام کے اعلیٰ حکام سے اہم ملاقات کی۔ اس موقع پر وفد کو ملک گیر پولیو مہم، نئی حکمت عملی اور حالیہ پیش رفت پر تفصیلی بریفنگ دی گئی۔ عالمی وفد نے حکومتِ پاکستان کی مؤثر قیادت اور انسدادِ پولیو پروگرام پر مکمل اعتماد کا اظہار کرتے ہوئے اپنے مسلسل تعاون کا عزم دہرایا۔ وفد نے پولیو وائرس کے خاتمے کے ساتھ ساتھ معمول کے حفاظتی ٹیکہ جات کے نظام کو مزید مضبوط بنانے پر زور دیا تاکہ صحتِ عامہ کا نظام مؤثر ہو سکے۔ دورے کے دوران وفد نے فرنٹ لائن پولیو ورکرز اور خواتین ہیلتھ ورکرز سے بھی ملاقات کی اور ان کے تجربات سنے، جہاں انہوں نے ملک بھر کے بچوں کو معذوری سے بچانے کے لیے فرنٹ لائن ورکرز کی گراں قدر اور غیر معمولی خدمات کو کلیدی قرار دیتے ہوئے انہیں زبردست خراجِ تحسین پیش کیا۔