یہ ورزش ہائی بلڈ پریشر کو قابو کرنےمیں مؤثر ثابت ہو سکتی ہے!

طبی ماہرین کی ایک حالیہ تحقیق میں یہ بات سامنے آئی ہے کہ ہائی بلڈ پریشر (بلند فشارِ خون) کے مریضوں کے لیے ہائی انٹینسٹی انٹرول ٹریننگ (HIIT) اور دیگر ایروبک ورزشیں دوا کی طرح اثر دکھاتی ہیں۔ برازیل کے ماہرین کی جانب سے کی گئی اس تحقیق کے نتائج ‘برٹش جرنل آف اسپورٹس میڈیسن’ میں شائع ہوئے ہیں، جس میں پہلی بار یہ واضح شواہد فراہم کیے گئے ہیں کہ ایچ آئی آئی ٹی اور مختلف ورزشوں پر مشتمل ‘کمبائنڈ ٹریننگ’ بلڈ پریشر کو نمایاں طور پر کم کرنے میں انتہائی مؤثر ہیں۔

تحقیق میں 31 مختلف مطالعات کا تجزیہ کیا گیا جن میں 1,345 ایسے افراد شامل تھے جو ہائی بلڈ پریشر کا شکار تھے۔ نتائج سے ثابت ہوا کہ جاگنگ، سائیکلنگ اور تیراکی جیسی ایروبک ورزشیں نہ صرف دل کی صحت کو بہتر بناتی ہیں بلکہ بلڈ پریشر کو قابو میں رکھنے کے لیے بھی ناگزیر ہیں۔ ماہرین کے مطابق یہ نتائج اس حقیقت کو مزید تقویت دیتے ہیں کہ باقاعدہ ورزش ہائی بلڈ پریشر کے مریضوں کی زندگی کو بہتر بنانے میں کلیدی کردار ادا کر سکتی ہے اور اسے علاج کے بنیادی حصے کے طور پر اپنایا جانا چاہیے۔