بنوں اور شمالی وزیرستان سے پولیو کے 2 نئے کیسز رپورٹ

پاکستان میں رواں سال پولیو وائرس کے مزید دو کیسز رپورٹ ہوئے ہیں، جن کا تعلق خیبر پختونخوا کے اضلاع بنوں اور شمالی وزیرستان سے ہے۔ اسلام آباد کی این آئی ایچ لیبارٹری نے وائلڈ پولیو وائرس کی تصدیق کر دی ہے، جس سے متاثر ہونے والوں میں 5 ماہ اور 2 سال کی دو معصوم بچیاں شامل ہیں۔ ان نئے کیسز کے سامنے آنے کے بعد سال 2026 میں پاکستان میں پولیو کیسز کی مجموعی تعداد 3 ہو گئی ہے، جبکہ پہلا کیس سندھ کے ضلع سجاول سے رپورٹ ہوا تھا۔ نیشنل ایمرجنسی آپریشن سینٹر (ای او سی) نے صورتحال کا نوٹس لیتے ہوئے رواں ماہ ملک بھر کے مخصوص اضلاع میں خصوصی انسدادِ پولیو مہم شروع کرنے کا فیصلہ کیا ہے جس کے دوران تقریباً ایک کروڑ 90 لاکھ بچوں کو حفاظتی قطرے پلائے جائیں گے۔