شدید گرمی میں گردوں کی حفاظت کیسے کی جائے؟ ماہرینِ صحت نے بتا دیا

طبی ماہرین نے انکشاف کیا ہے کہ سخت گرمی اور ہیٹ ویو کے دوران جسمانی درجہ حرارت میں اچانک تبدیلی گردوں کی صحت پر براہِ راست اثر انداز ہوتی ہے، جس کے نتیجے میں گردوں کی پتھری اور الیکٹرولائٹ عدم توازن جیسی پیچیدگیاں پیدا ہو سکتی ہیں۔ ماہرین کے مطابق 37 ڈگری سینٹی گریڈ سے زائد درجہ حرارت میں پسینے کے ذریعے پانی کا اخراج بڑھ جاتا ہے، جس سے جسم میں کیلشیم، آکسیلیٹ اور یورک ایسڈ کرسٹلز بننے لگتے ہیں جو بعد ازاں پتھری کی شکل اختیار کر لیتے ہیں۔ ماہرین نے متنبہ کیا ہے کہ صرف زیادہ پانی پینا ہی کافی نہیں بلکہ پانی پینے کا درست طریقہ اور غذائی اجزا کا توازن برقرار رکھنا بے حد ضروری ہے۔

ماہرین کا کہنا ہے کہ ایک ہی وقت میں ضرورت سے زیادہ پانی پینا خون میں سوڈیم کی سطح کو کم کر کے تھکن، سر درد اور چکر کا باعث بن سکتا ہے، جبکہ سافٹ ڈرنکس اور انرجی ڈرنکس کا استعمال گردوں پر اضافی دباؤ ڈالتا ہے۔ رپورٹ کے مطابق، پیشاب کا گاڑھا ہونا، رنگت میں تبدیلی، بدبو، جلن، کمر یا پہلو میں درد اور مسلسل پیاس گردوں کے متاثر ہونے کی ابتدائی علامات ہو سکتی ہیں۔ ان خطرات سے بچنے کے لیے ماہرین نے مشورہ دیا ہے کہ دن بھر تھوڑے تھوڑے وقفے سے پانی پیئں، چاہے پیاس نہ بھی لگی ہو، تاکہ جسم میں نمی برقرار رہے۔

احتیاطی تدابیر کے حوالے سے ماہرین نے زور دیا ہے کہ گرمیوں میں سبزیوں اور ٹھنڈے پھلوں کا استعمال بڑھا دیا جائے اور سخت دھوپ یا ورزش کے فوراً بعد ٹھنڈے پانی سے غسل (شاور) لینے سے گریز کیا جائے۔ خاص طور پر وہ افراد جو سخت جسمانی مشقت کرتے ہیں، انہیں معتدل الیکٹرولائٹ سپلیمنٹس لینے کا مشورہ دیا گیا ہے تاکہ جسم میں نمکیات کی کمی نہ ہو۔ ماہرین نے واضح کیا ہے کہ گردوں کی تکلیف یا پیشاب میں کسی بھی قسم کی غیر معمولی تبدیلی کی صورت میں فوری طور پر معالج سے رجوع کرنا چاہیے تاکہ کسی بڑے طبی بحران سے بچا جا سکے۔