جنگ سے متاثرہ پاکستانی طلبہ این ای بی امتحان میں شرکت کر سکتے ہیں: پی ایم ڈی سی

پاکستان میڈیکل اینڈ ڈینٹل کونسل (PMDC) نے جنگ زدہ علاقوں اور ایران میں زیرِ تعلیم پاکستانی میڈیکل و ڈینٹل طلبہ کے مستقبل کو تحفظ دینے کے لیے نیشنل ایکوئیولنس بورڈ (NEB) امتحان کا شیڈول جاری کر دیا ہے۔ اعلامیے کے مطابق، یہ امتحان 16 مئی 2026 کو راولپنڈی میں منعقد ہوگا، جس کے لیے آن لائن رجسٹریشن کا آغاز 9 اپریل سے ہوگا اور درخواست جمع کرانے کی آخری تاریخ 24 اپریل مقرر کی گئی ہے۔ پی ایم ڈی سی نے واضح کیا ہے کہ بیرونِ ملک تعلیم حاصل کرنے والے وہ طلبہ جو دو سال مکمل کر کے تیسرے سال میں ہیں، اس کمپیوٹر بیسڈ (MCQs) امتحان میں شرکت کے اہل ہوں گے۔ پاکستان کے میڈیکل کالجز میں مائیگریشن کے لیے این ای بی امتحان پاس کرنا ایک لازمی قانونی تقاضا ہے۔

پی ایم ڈی سی نے خاص طور پر ایران میں مقیم پاکستانی طلبہ کو ہدایت کی ہے کہ وہ قانونی تقاضے پورے کر کے بروقت رجسٹریشن کروائیں تاکہ ان کا تعلیمی سال ضائع نہ ہو۔ کونسل نے طلبہ اور والدین کو تنبیہ کی ہے کہ وہ بیرونِ ملک داخلوں سے قبل سیکیورٹی خدشات اور تعلیمی مستقبل کو مدنظر رکھتے ہوئے انتہائی محتاط رہیں۔ حکام کا کہنا ہے کہ طلبہ کی فلاح و بہبود ان کی اولین ترجیح ہے، اور امتحان کے نصاب، سینٹرز اور مکمل شیڈول کی تفصیلات پی ایم ڈی سی کی آفیشل ویب سائٹ پر فراہم کر دی گئی ہیں۔ یہ اقدام ان سینکڑوں طلبہ کے لیے بڑی راحت ثابت ہوگا جن کی تعلیم جنگی حالات کے باعث تعطل کا شکار تھی