فیصل آباد: حکومت پنجاب کا جعلی ادویات سے متعلق الرٹ جاری

حکومت پنجاب نے فیصل آباد سمیت صوبے بھر میں جعلی اور مضر صحت ادویات کے حوالے سے ہنگامی الرٹ جاری کر دیا ہے۔ الرٹ کے مطابق آنکھوں کی بیماریوں، امراضِ جلد اور سٹیرائڈز کے لیے استعمال ہونے والی بعض ادویات کے مخصوص بیچز (Batches) کو جانچ کے بعد انسانی صحت کے لیے انتہائی مضر قرار دیا گیا ہے۔

محکمہ صحت کے حکام کا کہنا ہے کہ لاہور، اسلام آباد اور ملتان کی ڈرگ ٹیسٹنگ لیبارٹریوں (DTLs) نے ان ادویات کے نمونوں کا تفصیلی تجزیہ کیا، جس کے بعد انہیں غیر معیاری اور مضر صحت قرار دیا گیا۔ حکومت نے فوری طور پر ہدایت جاری کی ہے کہ متعلقہ بیچ نمبر والی تمام ادویات کو فی الفور مارکیٹ سے اٹھا لیا جائے اور میڈیکل اسٹورز پر ان کی فروخت پر مکمل پابندی عائد کی جائے۔ محکمہ صحت نے شہریوں کو متنبہ کیا ہے کہ ان ادویات کے استعمال سے مریضوں کی زندگی کو شدید خطرات لاحق ہو سکتے ہیں۔ عوام سے اپیل کی گئی ہے کہ وہ صرف مستند اور ڈرگ کنٹرول اتھارٹی سے رجسٹرڈ میڈیکل اسٹورز سے ہی ادویات خریدیں اور خریدتے وقت بیچ نمبر اور ایکسپائری لازمی چیک کریں۔حکام نے تمام ڈرگ انسپکٹرز کو سختی سے ہدایت کی ہے کہ وہ مارکیٹوں کی چیکنگ کا عمل تیز کریں اور جو بھی اسٹور مالکان ان ممنوعہ بیچز کی فروخت میں ملوث پائے جائیں، ان کے خلاف ڈرگ ایکٹ کے تحت سخت قانونی کارروائی عمل میں لائی جائے۔ حکومت کا کہنا ہے کہ انسانی جانوں سے کھیلنے والے عناصر کے ساتھ کوئی رعایت نہیں برتی جائے گی۔