تپ دق صحت ، سماجی اور معاشی چیلنج، مکمل خاتمہ کیا جائے گا: شہباز شریف

اسلام آباد: وزیراعظم میاں محمد شہباز شریف نے عالمی یومِ تپِ دق کے موقع پر اپنے پیغام میں پاکستان سے اس موذی مرض کے مکمل خاتمے کے پختہ عزم کا اعادہ کیا ہے۔ وزیراعظم نے کہا کہ ٹی بی ایک قابلِ علاج اور قابلِ بچاؤ مرض ہے، لیکن اس کے باوجود یہ پاکستان سمیت کئی ممالک کے لیے ایک بڑا صحت، سماجی اور معاشی چیلنج بنا ہوا ہے، جو بالخصوص کمزور طبقات کو متاثر کر کے غربت اور عدم مساوات میں اضافے کا باعث بن رہا ہے۔

وزیراعظم شہباز شریف نے واضح کیا کہ حکومتِ پاکستان نے ٹی بی کے خاتمے کو صحتِ عامہ کی اہم ترجیح قرار دے دیا ہے۔ ایک جامع حکمتِ عملی کے تحت ملک بھر میں جدید تشخیصی سہولیات، لیبارٹری نیٹ ورک کی بہتری اور نگرانی کے نظام کو مضبوط بنایا جا رہا ہے۔ انہوں نے بتایا کہ بنیادی صحت کے مراکز میں ٹی بی کی خدمات کو مربوط کیا جا رہا ہے تاکہ ہر شہری کو معیاری علاج تک مفت اور آسان رسائی حاصل ہو۔

اپنے بیان میں وزیراعظم نے عوامی شمولیت اور سماجی رویوں کی تبدیلی پر زور دیتے ہوئے کہا کہ بیماری سے جڑے ‘اسٹیگما’ (معاشرتی بدنامی) کے خاتمے کے بغیر اس جنگ کو جیتنا ممکن نہیں۔ انہوں نے ہیلتھ ورکرز، سول سوسائٹی اور میڈیا سے اپیل کی کہ وہ مشترکہ کوششوں کو تیز کریں تاکہ ملک کا کوئی بھی ٹی بی کا مریض نظرانداز نہ ہو۔ وزیراعظم نے عالمی برادری سے بھی تکنیکی شراکت داری اور مستقل فنڈنگ کی ضرورت پر زور دیا تاکہ عالمی سطح پر اس وبا کا جڑ سے خاتمہ کیا جا سکے۔