خیرپور میں چکن پاکس سے تین نومولود بچے دم توڑ گئے

خیرپور: سندھ کے ضلع خیرپور میں چکن پاکس (چیچک) نے وبائی صورت اختیار کر لی ہے، جہاں گزشتہ تین دنوں کے دوران 3 نومولود بچوں سمیت مجموعی طور پر 5 بچے زندگی کی بازی ہار گئے۔ محکمہ صحت نے اب تک 3 بچوں کی اموات کی باقاعدہ تصدیق کی ہے۔ مقامی ذرائع کے مطابق کنب، بوزدار وڈا، گاڑہی پل اور گردونواح کے علاقوں میں 100 سے زائد بچے اس موذی مرض میں مبتلا ہیں، جس کے باعث علاقے میں شدید خوف و ہراس پھیل گیا ہے۔

ڈسٹرکٹ ہیلتھ آفیسر (DHO) ڈاکٹر برکت علی نے صورتحال کی سنگینی کا نوٹس لیتے ہوئے متاثرہ علاقوں میں سینئر ڈاکٹروں پر مشتمل 9 رکنی کمیٹی روانہ کر دی ہے جو بچوں کے خون کے نمونے اور دیگر ٹیسٹ جمع کرے گی۔ مزید برآں، ضلع بھر کے تمام تعلقہ ہسپتالوں میں ہنگامی بنیادوں پر آئیسولیشن وارڈز قائم کرنے کی ہدایات جاری کر دی گئی ہیں تاکہ متاثرہ بچوں کو دیگر سے الگ رکھ کر ان کا علاج کیا جا سکے۔