کشمور میں نامعلوم بیماری کی لہر؛ ایک ہی خاندان کے دو بھائیوں سمیت 4 بچے جاں بحق،

کشمور: سندھ کے قصبے کشمور کے قریب واقع گاؤں عطا محمد کھوسہ میں ایک نامعلوم اور پراسرار بیماری نے وبائی صورت اختیار کر لی ہے۔ ذرائع کے مطابق گزشتہ ایک ہفتے کے دوران اس بیماری سے چار معصوم بچے جاں بحق ہو چکے ہیں۔ انتہائی افسوسناک واقعہ اس وقت پیش آیا جب ایک ہی خاندان کے دو سگے بھائی، ارشاد علی اور عرفان علی سولنگی، 24 گھنٹوں کے اندر اس بیماری کا شکار ہو کر انتقال کر گئے۔

علاقہ مکینوں اور متاثرہ بچوں کے ورثا کا کہنا ہے کہ بیماری کی علامات میں سب سے پہلے گلا خراب ہونا شامل ہے، جس کے بعد دیکھتے ہی دیکھتے بچے کی حالت بگڑ جاتی ہے اور ایک ہی دن میں موت واقع ہو جاتی ہے۔ دیگر جاں بحق ہونے والوں میں صدام حسین اور سارا بی بی سولنگی بھی شامل ہیں۔

واقعے کی اطلاع ملتے ہی محکمہ صحت کی ٹیمیں متاثرہ گاؤں پہنچ گئی ہیں۔ طبی ماہرین نے علاقے کا معائنہ شروع کر دیا ہے اور بچوں کے خون کے نمونے حاصل کیے جا رہے ہیں تاکہ اس مہلک بیماری کی اصل وجوہات (جو ممکنہ طور پر خناق یا کوئی شدید وائرل انفیکشن ہو سکتی ہیں) کا تعین کیا جا سکے۔