بلیوں پر تحقیق سے کینسر کے علاج کی نئی راہیں روشن ہونے کا امکان

نیویارک: ماہرینِ طب نے انکشاف کیا ہے کہ بلیوں کا حیاتیاتی نظام اور بیماریوں کے خلاف ان کی قدرتی مزاحمت انسانوں میں کینسر کے علاج کے لیے کلیدی ثابت ہو سکتی ہے۔ جدید تحقیق کے مطابق جانوروں اور انسانوں کے مدافعتی اور جینیاتی نظام میں پائی جانے والی مماثلتیں سرطان کے خلاف جنگ میں ایک نیا سنگِ میل ثابت ہوں گی۔

سائنس دانوں کا کہنا ہے کہ بلیوں میں پایا جانے والا وائرس ‘ایف آئی وی’ (FIV) انسانی ایچ آئی وی سے مشابہت رکھتا ہے۔ اس مماثلت کی بنیاد پر قوتِ مدافعت کے ردِعمل کو سمجھنے اور ‘امیونوتھراپی’ کے ایسے نئے طریقے وضع کرنے میں مدد مل رہی ہے جو کینسر کے خلیوں کو نشانہ بنانے میں زیادہ مؤثر ہوں۔ تحقیق سے یہ بھی معلوم ہوا ہے کہ بلیوں میں قدرتی طور پر پائے جانے والے لیمفوما اور چھاتی کے کینسر انسانی سرطان سے مماثلت رکھتے ہیں، جس کی وجہ سے نئی ادویات کی آزمائش زیادہ حقیقت پسندانہ نتائج فراہم کرتی ہے۔

ماہرین کے مطابق انسان اور بلی کے جینوم میں ڈی این اے کی مرمت اور سیل گروتھ کنٹرول کے نظام مشترک ہیں۔ اسی تناظر میں ‘کمپیریٹو آنکولوجی’ (تقابلی سرطان شناسی) کا شعبہ تیزی سے ابھر رہا ہے، جہاں دونوں کے مشترکہ مطالعے سے کینسر کے جدید اور سستے علاج کی امید پیدا ہو گئی ہے