واشنگٹن: پاکستانی صوفی اوپیرا گلوکارہ سائرہ پیٹر کو “شی لیڈز دی نیشنز” ایوارڈ سے نوازا گیا

عالمی شہرت یافتہ پاکستانی صوفی اوپیرا گلوکارہ سائرہ پیٹر کو واشنگٹن ڈی سی میں امریکی کانگریس میں منعقدہ ’’She Leads the Nations Global Summit‘‘ میں اعلیٰ اعزاز سے نوازا گیا۔

تقریب میں دنیا بھر سے منتخب خواتین رہنماؤں کو ان کی قیادت اور خدمات کے اعتراف میں اعزازات دیے گئے۔ سائرہ پیٹر نے پرفارم کرتے ہوئے اوپیرا آریا “I Know That My Redeemer Liveth” پیش کی، جسے مظلوم خواتین کے نام منسوب کیا۔

سائرہ پیٹر نے کہا کہ امریکی کانگریس میں مدعو ہونا اور پاکستانی ثقافت کی نمائندگی کرتے ہوئے روایتی لباس میں تصویر بنوانا ان کے لیے فخر کی بات ہے۔ انہوں نے کہا کہ وہ صوفی موسیقی کے ذریعے خواتین اور بچوں میں امید اور وقار کے پیغام کو عام کرنے کی کوشش کر رہی ہیں۔

ان کی خدمات کو سراہتے ہوئے کہا گیا کہ انہوں نے شاہ عبداللطیف بھٹائی کے صوفی پیغامِ امن اور ہم آہنگی کو دنیا بھر میں موسیقی کے ذریعے پہنچایا اور نوجوان خواتین کی تربیت میں نمایاں کردار ادا کیا۔