ذیابیطس سے مریضوں میں ایک اور سنگین پیچیدگی کا خطرہ بڑھنے کا انکشاف

زندگی کس کو پیاری نہیں ہوتی مگر اچھی صحت کے بغیر جینا آسان نہیں ہوتا اور وہ جہنم جیسی لگنے لگتی ہے اور موجودہ عہد میں جو مرض انسانوں کے لیے سب سے زیادہ مہلک ثابت ہو رہا ہے وہ ذیابیطس ہے۔
ذیابیطس وہ مرض ہے جو دیمک کی طرح خاموشی سے انسانی جسم کے اندرونی اعضا کو چاٹ جاتا ہے اور اگر اس کے بارے میں بروقت معلوم نہ ہوسکے تو یہ بینائی سے محرومی سے لے کرگردوں کے فیل ہونے اور دیگر لاتعداد طبی مسائل کا سبب بنتا ہے۔
حیرت انگیز طور پر ذیابیطس ٹائپ ٹو کے بیشتر مریضوں کو اکثر بیماری کا علم ہی نہیں ہوتا۔
اب سائنسدانوں نے ایک ایسی علامت دریافت کی ہے جس کا سامنا ہونے پر آپ کو بلڈ شوگر ٹیسٹ کرالینا چاہیے۔
اسپین کی بارسلونا یونیورسٹی کی تحقیق میں بتایا گیا کہ ذیابیطس ٹائپ 2 کے مریضوں کے سننے کی حس متاثر ہوتی ہے۔
یعنی اگر اچانک آپ کو سننے کے مسائل کا سامنا ہو رہا ہے تو بہتر ہے کہ شوگر ٹیسٹ کرالیں کیونکہ یہ ذیابیطس ٹائپ 2 سے متاثر ہونے کی نشانی بھی ہوسکتی ہے۔
اس تحقیق میں 17 تحقیقی رپورٹس کے ڈیٹا کی جانچ پڑتال کی گئی تھی جن میں 3910 ذیابیطس کے مریض اور 4084 صحت مند افراد کو شامل کیا گیا تھا۔تحقیق میں دریافت ہوا کہ ذیابیطس ٹائپ 2 کے مریضوں میں حس سماعت سے محروم ہونے کی شرح 40 سے 71 فیصد تک تھی جبکہ صحت مند افراد کے مقابلے میں ان میں یہ خطرہ 4.19 گنا زیادہ ہوتا ہے۔