سائنسدانوں نے لمبی عمر کا راز دریافت کرلیا

اگر آپ لمبی اور صحت مند زندگی کے خواہش مند ہیں تو اس کے لیے سخت ورزش یا مشکل معمولات اپنانا ضروری نہیں، بلکہ مختلف جسمانی سرگرمیوں کو روزمرہ زندگی کا حصہ بنانا ہی کافی ہے۔

یہ بات امریکا میں ہونے والی ایک طویل المدتی طبی تحقیق میں سامنے آئی ہے۔ ہارورڈ یونیورسٹی کی اس تحقیق میں ایک لاکھ 11 ہزار سے زائد افراد کو شامل کیا گیا، جن کی صحت کا جائزہ 30 سال سے زیادہ عرصے تک لیا گیا۔

تحقیق کے دوران شرکاء کی ذاتی معلومات، طبی تاریخ اور طرزِ زندگی سے متعلق تفصیلات ہر دو سال بعد جمع کی جاتی رہیں۔ اس دوران یہ بھی معلوم کیا گیا کہ وہ چہل قدمی، جاگنگ، سیڑھیاں چڑھنے، سائیکل چلانے، ٹینس یا اسکواش جیسی جسمانی سرگرمیوں میں حصہ لیتے ہیں یا نہیں۔

تحقیق کے نتائج کے مطابق مختلف اقسام کی ورزشوں کو معمول بنانے والے افراد میں کسی بھی وجہ سے قبل از وقت موت کا خطرہ تقریباً 20 فیصد تک کم ہو جاتا ہے۔ جبکہ صرف چہل قدمی کو عادت بنانے سے ہی یہ خطرہ 17 فیصد تک گھٹ سکتا ہے۔

ماہرین کے مطابق یہ تحقیق اس بات کا واضح ثبوت ہے کہ معمولی لیکن باقاعدہ جسمانی سرگرمیاں صحت مند اور طویل زندگی میں اہم کردار ادا کرتی ہیں۔