تھنک فیسٹ: غذا کی قلت دور کرنے کیلئے ماحولیات کو قومی ایشو بنائیں، ذوالفقار بھٹو جونیئر

لاہور: تھنک فیسٹ 2026 کے پہلے سیشن میں ذوالفقار علی بھٹو جونیئر نے زور دیا کہ ماحولیات کو قومی ایشو بنایا جائے تاکہ غذا کی قلت اور مستقبل کے خطرات جیسے سیلاب سے نمٹا جا سکے۔

الحمرا آرٹس کونسل لاہور میں ماحولیات پر خطاب کرتے ہوئے انہوں نے کہا کہ ہر فرد کو گھر میں باغبانی کرنی چاہیے اور ماحول کا ہماری زندگی پر براہِ راست اثر ہے۔ انہوں نے کہا کہ ماحولیاتی مسائل معیشت کے ساتھ منسلک ہونے چاہئیں اور پاکستان اپنی شناخت کی تلاش میں ہے۔

بھٹو جونیئر نے مزید کہا کہ دریائے سندھ اور راوی ہماری پہچان ہیں اور ماحولیات کو حب الوطنی کا حصہ بنایا جائے۔ ان کے مطابق، ہر منصوبہ عوام کے لیے ہونا چاہیے، نہ کہ صرف اشرافیہ کے لیے۔

واضح رہے کہ تھنک فیسٹ 2026 تین روز تک جاری رہے گا، جس میں ملکی اور عالمی سیاسی و سماجی موضوعات پر ماہرین بحث کریں گے۔