ذیا بیطس کی علامت اور الزائمرز کے خطرے میں تعلق دریافت

ایک نئی تحقیق میں دریافت کیا گیا ہے کہ خون میں شوگر کی مقدار میں اضافہ، جو ذیا بیطس اور پری-ڈائیبیٹیز کی ایک عام علامت ہے، الزائمرز بیماری کے خطرے کو بڑھانے سے منسلک ہے۔

یونیورسٹی آف لیورپول کی تحقیق کے مطابق وہ افراد جن کے خون میں کھانے کے بعد شوگر کی مقدار زیادہ ہوتی ہے، ان کے بعد کی زندگی میں الزائمرز میں مبتلا ہونے کے امکانات زیادہ ہوتے ہیں۔ خون میں شوگر خاص طور پر اس وقت بڑھتی ہے جب گلوکوز کی مقدار فوری طور پر زیادہ ہو جائے اور دیر تک بلند رہے۔

تحقیق کے سربراہ ڈاکٹر اینڈریو میسن کا کہنا ہے کہ نتائج مستقبل میں اس کیفیت سے بچاؤ کے لیے لائحہ عمل تیار کرنے میں مددگار ثابت ہو سکتے ہیں۔ انہوں نے واضح کیا کہ بلڈ شوگر کو قابو کرنا اہم ہے، لیکن خصوصاً کھانے کے بعد شوگر کو قابو میں رکھنا زیادہ ضروری ہے۔

یہ تحقیق صحت مند غذا اور بلڈ شوگر کنٹرول کی اہمیت کو دوبارہ اجاگر کرتی ہے، اور یہ سمجھنے میں مدد دیتی ہے کہ ذیا بیطس کے شکار افراد کو الزائمرز سے بچاؤ کے لیے اضافی احتیاط کی ضرورت ہے۔