وزن گھٹانے والی ادویات کے استعمال سے متعلق ہوشرُبا انکشاف

ویگووی اور مونجارو جیسی وزن گھٹانے والی ادویات کی مقبولیت میں تیزی سے اضافہ دیکھنے میں آ رہا ہے، تاہم ماہرین نے ان ادویات کے بغیر نسخہ استعمال پر تشویش کا اظہار کیا ہے۔

یونیورسٹی کالج لندن کے محققین کی جانب سے 5260 افراد پر کیے گئے ایک سروے کے مطابق رواں سال تقریباً 33 لاکھ افراد وزن کم کرنے والی ادویات استعمال کر سکتے ہیں۔ سروے میں 2.9 فیصد شرکاء نے بتایا کہ وہ جی ایل پی-1 ادویات کے ذریعے وزن کم کر رہے ہیں، جس کا مطلب تقریباً 16 لاکھ افراد بنتے ہیں۔

تحقیق میں یہ بھی سامنے آیا کہ ان میں سے 15 فیصد افراد ایسی ادویات استعمال کر رہے ہیں جنہیں وزن کم کرنے کے لیے باضابطہ طور پر لائسنس حاصل نہیں۔ محققین نے خبردار کیا ہے کہ آف لیبل ادویات کا غیر تجویز شدہ استعمال صحت کے لیے سنگین خطرات پیدا کر سکتا ہے۔