سال 2026 کی پہلی ملک گیر انسدادِ پولیو مہم 2 تا 8 فروری منعقد ہوگی

اسلام آباد: نیشنل ایمرجنسی آپریشن سینٹر (نیشنل ای او سی) نے اعلان کیا ہے کہ سال 2026 کی پہلی ملک گیر انسدادِ پولیو مہم 2 فروری سے 8 فروری تک ملک بھر میں منعقد کی جائے گی۔

نیشنل ای او سی کے مطابق قومی پولیو مہم کے دوران 4 کروڑ 50 لاکھ سے زائد بچوں کو پولیو سے بچاؤ کے قطرے پلائے جائیں گے۔ یہ مہم پاکستان اور افغانستان میں بیک وقت منعقد کی جائے گی تاکہ سرحد پار وائرس کے پھیلاؤ کو مؤثر طور پر روکا جا سکے۔

بیان میں کہا گیا ہے کہ اس مہم میں 4 لاکھ سے زائد مرد و خواتین پولیو ورکرز فرائض انجام دیں گے، جو گھر گھر جا کر پانچ سال سے کم عمر بچوں کو پولیو کے قطرے پلائیں گے۔

نیشنل ای او سی نے والدین سے اپیل کی ہے کہ وہ پولیو ورکرز سے بھرپور تعاون کریں اور اپنے بچوں کو زندگی بھر کی معذوری سے محفوظ بنائیں۔ ساتھ ہی والدین کو ہدایت کی گئی ہے کہ پولیو ویکسینیشن کے ساتھ ساتھ بچوں کے معمول کے حفاظتی ٹیکہ جات کا کورس بھی بروقت مکمل کروائیں۔

پولیو مہم سے متعلق مزید معلومات کے لیے شہری 1166 پر کال کر سکتے ہیں یا 0346-7776546 پر واٹس ایپ پیغام بھیج سکتے ہیں۔