نیزل سپرے سانس کی نالیوں کو ناقابل تلافی نقصان پہنچا سکتا ہے، ماہرین

ماہرین صحت نے خبردار کیا ہے کہ ڈی کونجیسٹنٹ نیزل سپرے کا حد سے زیادہ اور طویل استعمال ناک کی سانس کی نالیوں کو ناقابلِ تلافی نقصان پہنچا سکتا ہے۔ ایک حالیہ تحقیق کے مطابق تقریباً 60 فیصد افراد اس بات سے لاعلم ہیں کہ ناک کے اس سپرے کو مسلسل استعمال نہیں کرنا چاہیے، جس کے باعث وہ ری باؤنڈ کنجیشن یعنی دوبارہ شدید ناک بند ہونے کی شکایت کا شکار ہو جاتے ہیں۔

رائل فارماسیوٹیکل سوسائٹی کے مطابق سپرے کے طویل استعمال سے ناک کی حساس خون کی نالیوں میں سوزش پیدا ہو جاتی ہے، جس سے ناک کی رکاوٹ مزید بڑھتی ہے اور مریض دوا پر انحصار کرنے لگتا ہے۔ اس کیفیت کو طبی اصطلاح میں رائٹائٹس میڈیسیمنٹوزا کہا جاتا ہے، جس کے نتیجے میں جلن، نزلہ، چھینکیں اور مستقل ناک بند ہونے جیسے مسائل پیدا ہو سکتے ہیں، جبکہ بعض مریضوں کو سرجری تک کروانا پڑتی ہے۔