کوئٹہ: نجی نرسری سے بچے کے مبینہ اغوا اور تبدیلی کا معاملہ، تین افراد گرفتار

کوئٹہ کی ایک نجی نرسری سے بچے کے مبینہ اغوا اور تبدیلی کے واقعے پر پولیس نے فوری کارروائی کرتے ہوئے مقدمہ درج کر لیا اور تین افراد کو گرفتار کر لیا ہے۔

ایس ایس پی آپریشنز کوئٹہ آصف خان کے مطابق واقعے کی اطلاع ملتے ہی پولیس حرکت میں آ گئی اور تحقیقات کا آغاز کر دیا گیا۔ انہوں نے بتایا کہ کیس کے تمام پہلوؤں کا باریک بینی سے جائزہ لیا جا رہا ہے تاکہ اصل حقائق سامنے آ سکیں۔

ایس ایس پی کا کہنا تھا کہ تحقیقات مکمل ہونے کے بعد حقائق عوام کے سامنے لائے جائیں گے جبکہ ملوث عناصر کے خلاف قانون کے مطابق سخت کارروائی کی جائے گی۔ پولیس حکام نے واضح کیا ہے کہ اس حساس معاملے میں کسی قسم کی کوتاہی برداشت نہیں کی جائے گی۔