مشہور کمپنی کا بچوں کیلئے تیار کردہ دودھ مضر صحت نکلا، استعمال نہ کرنے کی ہدایت

ایک معروف بین الاقوامی فوڈ کمپنی نے اپنے مخصوص بیبی فارمولا اور فالو آن فارمولا کو ممکنہ طور پر زہریلے مواد کی آلودگی کے خدشے کے پیش نظر متعدد ممالک سے واپس منگوانے (ریکال) کا اعلان کر دیا ہے۔

صحت کے متعلقہ اداروں اور کمپنی کی جانب سے جاری مشترکہ بیانات کے مطابق خدشہ ظاہر کیا گیا ہے کہ فارمولا دودھ میں شامل ایک جزو کم عمر بچوں میں فوڈ پوائزننگ اور ہیضہ جیسی سنگین بیماریوں کا سبب بن سکتا ہے، جس کے باعث یہ احتیاطی اقدام اٹھایا گیا ہے۔

کمپنی کے مطابق یورپ کے مختلف ممالک میں فروخت کیے جانے والے مخصوص بیچز کو فوری طور پر مارکیٹ سے ہٹایا جا رہا ہے۔ متاثرہ ممالک میں برطانیہ، فرانس، جرمنی، اٹلی، آسٹریا، ڈنمارک، سویڈن، فن لینڈ، آئرلینڈ اور سوئٹزرلینڈ شامل ہیں۔ کمپنی کا کہنا ہے کہ صارفین کی صحت اور بچوں کی حفاظت ان کی اولین ترجیح ہے، اسی لیے ممکنہ خطرے کے پیش نظر فوری کارروائی کی گئی۔

آفیشل نوٹسز کے مطابق خدشہ ہے کہ ان مصنوعات میں سیرولائڈ (Cereulide) نامی زہریلا مادہ موجود ہو سکتا ہے، جو بیکیلس سیریس (Bacillus cereus) بیکٹیریا کے بعض اسٹرینز سے پیدا ہوتا ہے۔ ماہرین کے مطابق یہ ٹاکسن جسم میں داخل ہونے کی صورت میں متلی، قے، شدید پیٹ درد، دست اور بعض کیسز میں ہیضہ جیسی علامات پیدا کر سکتا ہے، جو خصوصاً نوزائیدہ اور کم عمر بچوں کے لیے نہایت خطرناک ثابت ہو سکتی ہیں۔

صحت کے حکام نے والدین اور بچوں کی دیکھ بھال کرنے والوں کو ہدایت کی ہے کہ وہ متاثرہ بیچز کا فارمولا فوری طور پر استعمال کرنا بند کر دیں۔ والدین سے کہا گیا ہے کہ وہ پیکنگ پر درج بیچ کوڈز کو بغور چیک کریں اور اگر ان کا فارمولا واپس منگوائے گئے بیچز میں شامل ہو تو اسے بچوں کو ہرگز نہ دیں۔

کمپنی نے صارفین کو یقین دہانی کروائی ہے کہ متاثرہ مصنوعات واپس کرنے پر مکمل رقم واپس کی جائے گی جبکہ معاملے کی تفصیلی تحقیقات بھی جاری ہیں۔ صحت کے اداروں کا کہنا ہے کہ صورتحال پر مسلسل نظر رکھی جا رہی ہے اور ضرورت پڑنے پر صارفین کے تحفظ کے لیے مزید اقدامات بھی کیے جائیں گے۔