کراچی، بچوں کے حفاظتی ٹیکے پروگرام میں لڑکیوں کیلئے ایچ پی وی ویکسین بھی شامل

بچوں کے حفاظتی ٹیکہ پروگرام کے ڈائریکٹر ڈاکٹر راج کمار نے بتایا ہے کہ یکم جنوری 2026 سے ایچ پی وی (HPV) ویکسین کو روٹین ایمیونائزیشن پروگرام میں شامل کر لیا گیا ہے۔ اس فیصلے کے تحت 9 سال تک کی عمر کی بچیوں کو حفاظتی ٹیکے لگانے کا عمل شروع کیا جائے گا۔

ڈاکٹر راج کمار کے مطابق کراچی سمیت سندھ بھر کے تمام ڈسٹرکٹ ہیلتھ آفسران کو جاری مراسلے میں ہدایت کی گئی ہے کہ ای پی آئی کے حفاظتی مراکز پر آنے والی 9 سال تک کی عمر کی بچیوں کو ایچ پی وی ویکسین لگائی جائے۔

انہوں نے بتایا کہ حکومت سندھ نے تین سالہ ویکسین پروگرام کے لیے 797 ملین روپے وفاقی حکومت کو دینے کا فیصلہ کیا ہے، جس کے تحت ہر سال 7 لاکھ لڑکیوں کو ویکسین لگائی جائے گی۔ ویکسین کی خریداری وفاقی حکومت کرے گی جبکہ اس کی لاگت میں سندھ حکومت کا حصہ 797 ملین روپے ہوگا۔

واضح رہے کہ 15 ستمبر 2025 کو کراچی سمیت سندھ اور پنجاب میں پہلی بار لڑکیوں کو سروائیکل کینسر سے بچاؤ کے لیے ایچ پی وی ویکسین مہم شروع کی گئی تھی۔ اس مہم میں 9 سے 15 سال کی 41 لاکھ لڑکیوں کو ویکسین لگانے کا ہدف مقرر کیا گیا تھا، تاہم والدین کی بڑی تعداد نے عدم اعتماد کا اظہار کرتے ہوئے بچیوں کو ویکسین لگوانے سے انکار کیا۔

محکمہ صحت نے مہم کو کامیاب قرار دیا، لیکن اعدادوشمار اس کے برعکس تصویر پیش کرتے ہیں۔ ویکسین مہم کی ناکامی کی بڑی وجہ والدین کی جانب سے مؤثر رسپانس کا نہ آنا اور سوشل میڈیا پر ویکسین مخالف مہم قرار دی جا رہی ہے، جہاں اے آئی سے تیار کردہ ویڈیوز کے ذریعے خوف و ہراس پھیلایا گیا۔

ای پی آئی پروگرام کے مطابق کراچی میں ویکسین کوریج انتہائی کم رہی:

• ضلع کیماڑی: 1,54,632 میں سے صرف 16 فیصد

• ضلع شرقی: 2,91,552 میں سے 37 فیصد

• ضلع جنوبی: 1,73,772 میں سے 39 فیصد

• ضلع وسطی: 2,84,976 میں سے 42 فیصد بچیوں کو ویکسین لگائی جا سکی

محکمہ صحت کا کہنا ہے کہ آئندہ روٹین ایمیونائزیشن میں شمولیت سے ایچ پی وی ویکسین کی قبولیت اور کوریج میں نمایاں بہتری متوقع ہے۔