پاکستان میں ادویات اور میڈیکل آلات کی برآمدات میں 34 فیصد اضافہ

اسلام آباد: پاکستان میں ادویات اور میڈیکل آلات کی برآمدات میں 34 فیصد نمایاں اضافہ ریکارڈ کیا گیا ہے۔ ڈرگ ریگولیٹری اتھارٹی آف پاکستان (ڈریپ) کے مطابق یہ اضافہ ادارہ جاتی اصلاحات، شفاف ریگولیٹری نظام اور ڈیجیٹل اقدامات کا براہِ راست نتیجہ ہے۔

ڈریپ کے اعلامیے میں بتایا گیا کہ مؤثر ریگولیٹری اصلاحات کے ذریعے اربوں روپے کی بچت ممکن بنائی گئی ہے، جبکہ ریگولیٹری امور کا تقریباً 70 فیصد حصہ ڈیجیٹل ہو چکا ہے اور مارچ تک اسے 100 فیصد ڈیجیٹل بنانے کا ہدف مقرر کیا گیا ہے۔

اعلامیے کے مطابق آن لائن میڈیکل ڈیوائسز رجسٹریشن، ای آفس اور ون ونڈو سہولت جیسے اقدامات سے تاخیر میں نمایاں کمی آئی ہے۔ ادویات کی برآمدی رجسٹریشن کا دورانیہ 60 دن سے کم ہو کر 10 دن رہ گیا ہے، جبکہ ایف ایس سی اور سی او پی پی جیسے سرٹیفکیٹس اب 30 دن کے بجائے صرف 5 دن میں جاری کیے جا رہے ہیں۔

ڈریپ کے مطابق میڈیکل ڈیوائسز کی رجسٹریشن کا دورانیہ بھی کم ہو کر تقریباً 20 دن رہ گیا ہے۔ ادارے کا کہنا ہے کہ پاکستان کو دواسازی کے شعبے میں خود کفیل بنانے کے لیے ون ونڈو سہولت، نئی تھراپیز اور کینسر سے متعلق مصنوعات کے لیے تیز رفتار منظوری کا نظام متعارف کرایا گیا ہے۔

اعلامیے میں مزید بتایا گیا کہ ادویات کے معیار کو یقینی بنانے کے لیے قومی سطح پر کوالٹی کنٹرول لیبارٹری نیٹ ورک قائم کر دیا گیا ہے، قومی ویکسین پالیسی کا مسودہ تیار ہو چکا ہے اور مقامی سطح پر اے پی آئی کی تیاری کے لیے روڈمیپ پر کام جاری ہے۔

ڈریپ کے مطابق وزیر اعظم نے دسمبر 2025 میں ادارے کو اصلاحات پر شاندار کارکردگی کے اعتراف میں ”ریفارم چیمپئن ایوارڈ“ سے نوازا تھا۔