2025 میں 7 لاکھ 62 ہزار سے زائد پاکستانی ملازمت کے لیے بیرون ملک گئے

اسلام آباد: بیورو آف امیگریشن نے بیرون ملک ملازمت کے لیے جانے والے پاکستانیوں کا تازہ ڈیٹا جاری کر دیا ہے، جس کے مطابق سال 2025 میں مجموعی طور پر 7 لاکھ 62 ہزار 499 پاکستانی روزگار کے لیے مختلف ممالک گئے، جبکہ سال 2024 میں یہ تعداد 7 لاکھ 27 ہزار 381 تھی۔

دستاویزات کے مطابق 2025 میں بیرون ملک جانے والوں میں 5 ہزار 659 اکاؤنٹنٹس، 10 ہزار 503 باورچی، 3 ہزار 795 ڈاکٹر، 5 ہزار 946 انجینیئرز، 1 ہزار 640 نرسز اور 1 ہزار 725 اساتذہ شامل ہیں۔ اسی طرح 1 لاکھ 63 ہزار 718 ڈرائیور، 6 ہزار 475 الیکٹریشن، 4 لاکھ 65 ہزار 138 مزدور اور 5 ہزار 700 مستری بھی روزگار کے لیے بیرون ملک گئے۔

اعداد و شمار کے مطابق سال 2025 میں 12 ہزار 703 ٹیکنیشنز، 11 ہزار 777 مینیجرز، 2 ہزار 306 پلمبرز اور 2 ہزار 27 ویٹرز نے بھی بیرون ملک ملازمت اختیار کی۔ مجموعی طور پر 18 ہزار 352 اعلیٰ تعلیم یافتہ، 13 ہزار 657 انتہائی ہنرمند، 2 لاکھ 22 ہزار 171 ہنرمند، 42 ہزار 257 نیم ہنرمند اور 4 لاکھ 66 ہزار 62 غیر ہنرمند افراد بیرون ملک گئے۔

ملکوں کے لحاظ سے سب سے زیادہ 5 لاکھ 30 ہزار 256 پاکستانی سعودی عرب گئے، جبکہ 52 ہزار 664 متحدہ عرب امارات، 68 ہزار 376 قطر، 37 ہزار 726 بحرین اور 6 ہزار 590 کویت گئے۔ دیگر ممالک میں جنوبی کوریا (39)، امریکا (1005)، برطانیہ (4355)، جرمنی (984)، اٹلی (813)، چین (2230)، جاپان (2210) اور رومانیہ (1109) شامل ہیں۔