نومبر میں روشن ڈیجیٹل اکاؤنٹس میں 18 کروڑ 10 لاکھ ڈالر کی آمد

اسٹیٹ بینک آف پاکستان کے مطابق نومبر 2025ء کے دوران روشن ڈیجیٹل اکاؤنٹس (RDA) میں 18 کروڑ 10 لاکھ ڈالر جمع کروائے گئے۔ اس کے ساتھ ہی روشن ڈیجیٹل اکاؤنٹس کے ذریعے آنے والی مجموعی رقوم 11 ارب 49 کروڑ 40 لاکھ ڈالر تک پہنچ گئی ہیں۔

اسٹیٹ بینک کے اعداد و شمار کے مطابق روشن ڈیجیٹل اکاؤنٹس میں سے اب تک 7 ارب 39 کروڑ ڈالر پاکستان میں مختلف مدات میں استعمال ہو چکے ہیں، جبکہ 1 ارب 92 کروڑ ڈالر کا منافع بیرونِ ملک منتقل کیا گیا ہے۔ روشن ڈیجیٹل اکاؤنٹس پر مجموعی واجب الادا ذمہ داری 2 ارب 19 کروڑ ڈالر ہے۔مرکزی بینک کے مطابق روایتی نیا پاکستان سرٹیفیکیٹس کے ذریعے 49 کروڑ 60 لاکھ ڈالر کی سرمایہ کاری پاکستان میں آئی، جبکہ اسلامی نیا پاکستان سرٹیفیکیٹس کے ذریعے 1 ارب ڈالر موصول ہوئے۔ اسی طرح روشن ڈیجیٹل اکاؤنٹس کے ذریعے اسٹاک مارکیٹ میں 10 کروڑ ڈالر کی سرمایہ کاری بھی کی گئی۔اسٹیٹ بینک نے بتایا کہ نومبر 2025ء کے دوران 9 ہزار 572 نئے روشن ڈیجیٹل اکاؤنٹس کھلوائے گئے، جس کے بعد روشن ڈیجیٹل اکاؤنٹس کی مجموعی تعداد 8 لاکھ 83 ہزار 37 ہو گئی ہے۔اعداد و شمار کے مطابق روشن ڈیجیٹل اکاؤنٹس اوورسیز پاکستانیوں کے اعتماد اور پاکستان میں سرمایہ کاری کے رجحان کی عکاسی کر رہے ہیں۔